María e Aroa, dúas das 8 rapazas mentorizadas do Programa de Mentoring de Descúbreas, lideran a banda
Norde é unha nova banda de música indie rock en castelán nada en Vigo, formada por cinco membros de diferentes escolas da cidade. O grupo xorde a partir do dúo acústico de versións que empezaron Aroa Ferreiro e María Ferreirós, vocalista e guitarrista da formación. Tras o parón profesional que supuxo a situación derivada do COVID-19, centraron a súa actividade na composición das súas propias cancións. Posteriormente, Dani González uniuse ao proxecto como segundo guitarrista. Lucas San Teodoro e Mateo Fernández incorporáronse finalmente como baixista e batería do grupo. O propio nome da banda fai referencia ás orixes dos compoñentes. Norde forma parte do título dunha obra de Álvaro Cunqueiro, e é a antiga nomenclatura galega da palabra Norte. Partindo da paisaxe e a cultura galega crean unha atmosfera que dá lugar aos valores e estética do grupo.
O estilo musical da banda xorde por mor das diferentes influencias coas que creceron e formaron os seus compoñentes. Partindo de letras poéticas e persoais que se afastan das estruturas convencionais, compoñen un universo alternativo, detallado e emocional, que combina liñas melódicas dinámicas e alcanzan unha sonoridade case sinfónica.
O seu primeiro single “El Reflejo” é unha reflexión sobre o tempo e as emocións. Unha canción que trata de eliminar estigmas sobre as emocións e os procesos mentais que sofren as persoas ao longo de toda unha vida. Fala dos xigantes que ás veces ocupan as nosas cabezas. A banda pretende sensibilizar sobre a deterioración cognitiva e faio cunha letra elegante e unha composición sonora contundente e sofisticada.
