Se hai un festival diverso, sostible e diferente en Pontevedra, ese é, sen dúbida, o Festival SinSal. Por iso, cando o pasado mes de xullo o seu director invitou o equipo de Descúbreas a participar nel non puidemos alegrarnos máis. En SinSal teñen claro que a sostibilidade é un motor de cambio nos ámbitos social, medioambiental e económico. Por iso, no festival coidan aspectos coma o protagonismo das mulleres no persoal traballador e no cartel artístico, a eliminación de plásticos, a diversidade e a utilización de produtos ecolóxicos e locais na oferta gastronómica. Ademais, reutilizan materiais e ofrecen propostas de transporte compartido.
Así mesmo, organizan mesas nas que lle presentan ao público iniciativas que se realizan en todo o mundo para acadar eses cambios sociais, medioambientais e económicos. Durante os días do festival, do 23 ao 25 de xullo, e baixo o nome de “Localizar e deslocalizar”, SinSal acolleu as mesas redondas Cultura e Cooperación para o Desenvolvemento Rural, Os Obxectivos de Desenvolvemento Sostible (ODS) nos Festivais Internacionais e Mulleres na Cultura Internacional. De Oslo a Beirut. É nesta última onde Descúbreas se lles presentou ao público de SinSal e ás compañeiras na mesa, que son: Amani Seeman, a promotora do programa Beirut and Beyond Festival co que esperamos poder colaborar nun futuro, e Sandrine Crisostomo, promotora do primeiro festival de cine feito por mulleres en Chile.
O encontro foi precedido do discurso da presidenta da Deputación de Pontevedra, Carmela Silva, que estivo acompañada pola deputada de Turismo, Ana Laura Iglesias. Este espazo para compartir experiencias que buscan un futuro sostible e máis xusto a través da cultura e a arte conta co apoio do programa PICE de Acción Cultural Española.
Leticia Rey en el Festival SinSal
Ademais, Descúbreas estivo presente nesta edición do Festival SinSal doutra forma. Grazas ao grupo de profesionais da nosa plataforma, a organización do evento coñeceu e contactou con Leticia Rey para que actuase o venres. Ela é unha cantautora galega que desde os 11 anos está entregada ao estudo da música: solfexo, piano, guitarra, harmonía, e máis recentemente, voz e canto. A súa música é luminosa e mística, entre o onírico e o real, e inspira melodías que se moven entre o indie e o folk.
